basement flooring options

A Estación de Viticultura e Enoloxía de Galicia celebrará o venres 24 as terceiras xornadas técnicas no Auditorio da Xuventude de Cambados. O evento titulado “Estratexias para o achegamento do viño ao consumidor - A xeración “Millennial”” conta con 100 prazas. A inscrición estará aberta ata o xoves a través da páxina evega.xunta.gal.

PONTEVEDRA. O Presidente da Xunta de Galicia reuniuse esta mañá co alcalde de Pontevedra. Un encontro que solicitara Miguel Anxo Fernández Lores para intentar avanzar nas infraestruturas da cidade. Os dous temas principais nesta xuntanza foron o Gran Montecelo e o Dragado do Lérez. Dous proxectos moi importantes para os veciños da Boa Vila.

A Xunta de Galicia e o Concello de Pontevedra deron esta mañá un paso importante para mellorar as infraestruturas da cidade. A principal, o Gran Montecelo. Segundo informou Alberto Núñez Feijoo, neste novo hospital haberá novos servizos, como a radioterapia, a UCI pediátrica ou a medicina nuclear. Tamén intentarase dar maior confort aos usuarios e, por iso, o 60% das habitacións deste novo centro serán de uso individual.

Outro dos temas básicos desta reunión foi o Dragado do Lérez. Unha demanda histórica por parte da cidadanía. O presidente da Xunta de Galicia anunciou que os lodos e os áridos verteranse nun punto habilitado pola Administación Xeral do Estado.

Feijoo e Lores están de acordo en que non se pode colapsar a depuradora dos Praceres de augas pluviais. Por iso, a Xunta comprometeuse esta mañá a crear un emisario sumarino cun investimento de 10 millóns de euros.

Vilagarcía prepárase para a celebración do europeo junior de Vela nas modalidades de 420 e 470. O evento no que participarán 390 deportistas de 24 países disputarase do 23 ao 30 de xullo. 10 galegos entre eles o vilagarcián Jacobo García competirán no evento.

A vilagarciá Alba Tomé entre as seleccionadas para o premio universitario “Contar a Ciencia”. O seu traballo “como gañar o que che quita o Parkinson” consiste nunha reportaxe audiovisual sobre a investigación en torno a esta enfermidade. O fallo do xurado coñecerase en xuño.

A actividade, organizada pola Dirección Xeral de Emerxencias e a consellería de Medio Rural, forma parte do Plan Especial de Protección Civil ante emerxencias de Galicia.

PONTEVEDRA. O Café Moderno Afundación de Pontevedra acolle, dende hoxe, a mostra “Como me presento?”. Unha exposición que pretende facer reflexionar á cidadanía sobre a identidade social das persoas con Trastorno do Espectro Autista. 17 encontros fotográficos que contaron coa participación de personaxes famosos como o actor Luís Tosar, o cociñeiro Pepe Solla ou a cantante Sés.

Facer visibles aos colectivos máis invisibles da sociedade. Ese é o obxectivo desta mostra. Como me presento? chega ao Café Moderno Afundación de Pontevedra para que á cidadanía se cuestione e reflexione sobre a forma en que se constrúe a identidade social das persoas diversas, como por exemplo das que teñen Trastorno do Espectro Autista.

Cun espazo íntimo e coa mensaxe clara de que a arte é unha ferramenta de igualdade, Esteban DelaIglesia e Manu Suárez fotografaron a 17 parellas formadas por personaxes famosos, como Luís Tosar, Pepe Solla ou Sés, e persoas ignoradas socialmente.

A exposición poderase visitar ata o vindeiro 13 de xullo en horario de luns a venres de 17:30 a 20:30 horas e os sábados tamén pola mañá, de 11h a 14h. En total, 17 encontros fotográficos cos que se pretende fomentar a inclusión.

POIO. O Concello de Poio contará cun tripartito durante os vindeiros 4 anos. Finalmente, tras varias negociacións, o BNG, o PSOE e Avante Poio chegaron a un acordo. Un pacto de goberno baseado na transparencia, na rexeneración e na participación veciñal.

A balanza no Concello de Poio finalmente decántase do lado da esquerda. O BNG, o PSOE e Avante Poio asinaron esta mañá o acordo de gobernabilidade para os vindeiros 4 anos. Un tripartito que deixa fora ao PP de Ángel Moldes, ao sumar 9 concelleiros, fronte aos 8 dos populares. As tres forzas aseguraron que as similitudes entre os seus programas electorais foi a clave para poder conformar un goberno progresista.

O tripartito estará baseado na transparencia e na rexeneración. As iniciativas máis destacas deste novo acordo de goberno son: a humanización de núcleos tradicionais, a urbanización de a Barca, a mellora da PO-308 e do vial do Vao, o impulso polo PXOM ou a creación dun novo pavillón de deportes. Unhas medidas pensadas no futuro dos veciños de Poio.

Silvia Díaz explicou esta mañá que Avante Poio decidiu finalmente dar o seu apoio ao BNG de Luciano Sobral pola necesidade de mellorar e avanzar no municipio.

No reparto de áreas hai dous grandes novidades. A creación da competencia de Participación veciñal e de Transparencia e Espazos cidadáns. Dúas novas áreas que serán xestionadas por Avante Poio.

O BNG manterá áreas clave como Facenda, Sanidade, Educación, Cultura ou Deportes. O PSOE continuará xestionando as competencias de Obras e Servizos, Pesca e Marisqueo, Urbanismo e Promoción Económica e Benestar Social e Xuventude. Avante Poio, ademais das dúas áreas de nova creación, traballará tamén en Turismo e Igualdade. Este novo reparto no Concello está pensado para traballar polo que lles une, que é Poio.

PONTEVEDRA. Cerponzóns está de aniversario porque cúmprense 1.000 anos dende a primeira vez que se rexistrou a parroquia nun documento oficial. Para celebralo, a asociación de veciños O Chedeiro puxo en marcha dúas iniciativas. Un documental, rodado por Pablo Cacheda, e un libro escrito por Rodrigo Cota e o seu fillo. Dous proxectos que estarán dispoñibles nos vindeiros días.

Non todos os días cúmprense 1.000 anos. E se non que llo digan aos veciños de Cerponzóns que, para conmemorar o aniversario da súa parroquia levaron a cabo dous proxectos. O primeiro “Cerponzóns a mil”. Un documental de 41 minutos que recolle diferentes conversas entre os veciños.

A asociación de veciños O Chedeiro tamén puxo en marcha o libro “1.000 anos de historia en Cerponzóns”. Unha obra escrita por Rodrigo Cota e polo seu fillo e coa que se pretende recordar todas as historias que se esconden na parroquia.

O primeiro documento oficial no que se rexistrou a parroquia de Cerponzóns data do 30 de marzo de 1019, pero a súa historia é moito máis longa. Para recordala, a asociación de veciños presentará este xoves ás 21 horas no Teatro Principal o documental de Pablo Cacheda. O libro será presentado o venres 28, tamén ás 21 horas, no centro social de Cerponzóns. A entrada ás dúas citas é gratuíta.

Cambados organiza a súa segunda feira do libro despois de 20 anos. A vila contará con dez expositores de obras literarias e diferentes actividades como teatro e cine. A feira estará aberta ata o día 22.

PONTEVEDRA. A primeira fin de semana de peñas péchase sen grandes incidentes. As rúas e prazas do centro da cidade enchéronse de mozos e mozas pero con moita menos afluencia que outros anos. En total, recolléronse 10 toneladas de lixo e soamente dous persoas foron trasladadas ao Hospital Montecelo por intoxicación etílica.

Os mozos e mozas da cidade celebraron esta fin de semana a súa tradicional festa de peñas. Unha celebración que este ano acolleu a moita menos xente que nas edicións pasadas, o que provocou que non se incrementase o operativo especial de tráfico. Durante a noite do sábado, a ambulancia da Praza de España que estaba dando servizo entre ás 18h e ás 02h atendeu a 2 persoas por cortes e feridas. Outras 2 foron trasladadas ao Hospital Montecelo por intoxicación etílica. Outro rapaz foi denunciado por ruídos ante o Concello por ir pola rúa cun altofalante e por desobediencia ante a Subdelegación do Goberno. En canto o lixo, o sábado recolléronse 8 toneladas e o domingo outras 2.

Os hostaleiros foron a cara b destas festas. Por motivos de seguridade moitos locais da zona de Santa María optaron por pechar os seus establecementos durante a celebración das peñas. Un feito que non sorprendeu ao Concello.

Como ven sendo habitual dende hai anos, o Concello manifestou esta mañá o seu apoio a estas festas. Carme da Silva cre que os mozos teñen dereito a celebrar as peñas nos espazos públicos da cidade e asegura que este feito non é incompatible coa actividade hostaleira.

Dende o Concello informaron tamén que durante a xornada do sábado, todos os controis de alcohol e drogas que se practicaron foron negativas. Algo que demostra, segundo o goberno municipal, a responsabilidade e seriedade da xuventude pontevedresa.

PONTEVEDRA. Co verán chegan as actividades organizadas polo Local de Música de Pontevedra. Unha ampla programación que busca profesionalizar aos grupos musicais da cidade. Ademais, este ano, o fan cun logo e cunha páxina web completamente renovados.

As Festas da Peregrina, O Son da Serea e o Serán de Tralla. Esas son as tres grandes propostas do Local de Música de Pontevedra para este verán. Tres citas que buscan dar a coñecer aos grupos da cidade.

Ademais das Peregrinas, onde actuará o grupo Fondo Norte, e o o Son da Serea que se celebrará o 29 e 30 de xullo con grupos como Liberad al Kraken, Cubo Metálico ou Jacobo Sainz, a primeira cita deste ano e o Serán de Tralla. O evento, que se levará a cabo este sábado no skatepark de mollabao preténdese unificar o deporte e a música. Nel, estarán grupos como Daquela, Deliria Drama ou Proceso Norte. Por outra banda e, como novidade este ano, o Local de Música estrea logo e páxina web, a cal permitirá abrir itinerarios formativos e na cal estará integrada a programación de Cabos Soltos.

Coa nova imaxe lista, coa páxina web localdemusica.gal dispoñible e cunha programación tan completa, agora soamente queda vivir o verán rodeados da mellor música feita en Pontevedra.

Histórico pleno de investidura no Concello de Catoira. Xoán Castaño fíxose co bastón de mando grazas ao apoio do BNG. Ambas formacións aseguraron que non fixeran ningún pacto.

A dose deportiva e solidaria da Festa do Viño Tinto do Salnés en Ribadumia chegará coa súa andaina. Para inscribirse, os participantes deberán achegar a vontade e o recadado destinarase a Esperanza Salnés. A cita será o día 2 de xuño.

O PSOE de Boiro presentou onte pola noite a súa candidatura no centro social da localidade. Ademais de dar a coñecer á totalidade dos integrantes da lista, o candidato José Ramón Romero aproveitou o acto para dar a coñecer algúns dos proxectos máis importantes do programa de goberno.

PONTEVEDRA. Continúa a campaña electoral. O Partido Popular comprometeuse hoxe a aprobar un novo Plan Xeral de Ordenación Municipal se consegue gañar ás eleccións municipais. O candidato á alcaldía está convencido da importancia de elaborar un novo PXOM adaptado ás necesidades de Pontevedra.

O Partido Popular continúa achegando as súas propostas aos veciños de Pontevedra. Nesta quinta xornada de campaña electoral, o candidato á alcaldía comprometeuse a aprobar un novo Plan Xeral de Ordenación Municipal no seu primeiro mandato. Rafa Domínguez está convencido de que a creación dun novo PXOM permitiría asentar as bases para poder construír un parque empresarial.

Esta foi soamente unha das propostas que os populares quixeron achegar esta mañá aos veciños. Rafa Domínguez mostrouse moi satisfeito coa acollida que está recibindo o seu programa electoral na cidade.

O principal obxectivo dos populares é crear máis postos de traballo en Pontevedra e o candidato popular á alcaldía cre que a elaboración dun novo Plan Xeral determinaría os espazos de solo empresarial da cidade e isto ofrecería máis oportunidades de futuro aos pontevedreses.

O escritor Marcos Calveiro será o encargado de dar o pregón nas festas de San Roque de Vilagarcía. Os festexos que terán lugar do 14 ao 25 de agosto inclúen actividades para todas as idades. Entre as actuacións destacan Blas Cantó, Víctor Manuel e Xoel López.

Ravella por fin poderá abordar o problema de seguridade viaria do acceso ao barrio da Torre. Tras anos de xestións cos propietarios do terreo, o concello asinou a compra da superficie na que se sitúa unha vivenda arruinada que terán que demoler para ampliar a curva da Golpelleira. A operación suporá un desembolso de algo máis de 10.000 euros ás arcas municipais.

POIO. Combarro prepárase para acoller un dos festivais máis populares da parroquia: o Armadiña Rock. O evento, que está enmarcado dentro da Festa do Mar, desenvolverase entre os días 23 e 25 de agosto. Triángulo de Amor Bizarro, Heredeiros da Crus e Dubioza Kolektiv son os cabezas de cartel deste ano.

Chega o evento máis roqueiro da comarca. Todo listo para celebrar en Combarro unha nova edición do Armadiña Rock. A organización deste evento quería traer máis frescura para esta 11ª edición. E por iso, para comezar con bo pé, o vindeiro xoves haberá un pregón a cargo de Xosé Constela.

Tras o pregón, o venres comezará a soar a música. Polo Armadiña pasarán este ano 22 grupos. Deles, 20 son galegos. Os máis esperados desta edición son, sen dúbida, Dubioza Kolektiv, Heredeiros da Crus e Triángulo de Amor Bizarro.

Para completar a programación, o Armadiña celebrará este ano un Circo na praza da Chousa, un concurso de decoración mariñeira e, por suposto, o Armadiña Kids.

Coma sempre, todas estas actividades serán de balde. Ao igual que o será o camping. Lembramos que para acampar, este ano, non fai falla a inscrición previa.

Con esta incrible programación, o Armadiña espera superar todos os récords de participación e demostrar que o rock nunca morre, pero moito menos, en Combarro.

O colexio de Rubiáns volve a celebrar a súa festa do deporte. A escola dedica o día, este ano, ao Kempo. O alumnado gozou dunha práctica de exhibición.

PONTEVEDRA. Carmela Silva foi reelixida esta mañá como presidenta da Deputación de Pontevedra. O PSOE e o BNG continuarán gobernando en coalición durante os vindeiros 4 anos. Unha nova etapa na que todos os partidos tenderon a súa man para seguir colaborando polo interese da cidadanía.

Carmela Silva volverá a ser a Presidenta da Deputación durante os vindeiros 4 anos. O acordo de goberno entre o PSOE e o BNG fixo posible que Carmela volvese a ser investida esta mañá para seguir liderando a institución provincial. Unha nova etapa que comeza e na que a igualdade e o medio ambiente serán os dous eixes principais.

O apoio á diversidade, a loita contra o despoboamento, o turismo, o desenvolvemento económico e a aposto polo Plan Concellos serán tamén as liñas polas que camiñará a Deputación durante estes 4 anos. Carmela Silva tamén quixo aproveitar a ocasión e enviar unha mensaxe á Xunta de Galicia.

Tanto o voceiro do BNG como o do PP destacaron nas súas intervencións a importancia de seguir traballando por e para os cidadáns. E, mentres César Mosquera falou de humildade e sensatez, Jorge Cubela apostou pola renovación e a colaboración.

O acto, que se pechou co himno galego, serviu para demostrar que a transformación da provincia está en marcha e, que segundo a Presidenta da Deputación, é un cambio imparable.